دبئی، ایکسپو 2020 دبئی میں ہفتہ کو بیلجیئم کے قومی دن کی تقریب کا انعقاد کیا گیا جس میں بیلجیئم کے بادشاہ فلپ لیوپولڈ لوئس میری نے شرکت کی،اس موقع پر شاندار پریڈ اور دلچسپ میوزیکل پرفارمنس پیش کی گئی۔ رواداری اور بقائے باہمی کے وزیراور ایکسپو 2020 دبئی کے کمشنر جنرل شیخ نہیان مبارک آلنھیان نے کنگ فلپ اور ملکہ میتھلڈ کا استقبال کیا
،بیلجیئم کے نائب وزیر اعظم وزیر اقتصادیات و روزگار پیری-یویس ڈرماگن، نائب وزیر اعظم وزیر برائے امور خارجہ، یورپی امور اور خارجہ تجارت و وفاقی ثقافتی ادارے صوفی ولس بھی ان کے ہمراہ تھے ۔
اس موقع پر کنگ فلپ نے کہاکہ متحدہ عرب امارات اپنی منفرد ثقافت کو برقرار رکھتے ہوئے، ثقافت کے سنگم کا ایک عالمی مرکز بن گیا ہے۔ بیلجیم کو اس بات پر فخر ہے کہ وہ ایک شراکت دار اور دوست کے طور پر آپ کے ساتھ ہے، اور اماراتی خواب کو شرمندہ تعبیر کرنے میں تعاون کا منتظر ہے۔ ایکسپو 2020 دبئی کووڈ19کی وبا کے بعد ہونے والی پہلی بڑی تقریبات میں سے ایک ہے۔
آپ کی کامیابی واقعی متاثر کن ہے۔ انہوں نے کہا کہ بیلجیم کا پویلین ملاقات کی ایک جگہ کے طور پر ڈیزائن کیا گیا ہے۔ یہ ثقافتوں کے درمیان رابطوں، مکالمے کو فروغ دینے، اور اختراع کو فروغ دینے کے لیے ہمارے مشترکہ عزم کی علامت ہے۔ اپنے خیالات کا اظہار کرتے ہوئے شیخ نہیان نے کہاکہ ایکسپو میں بیلجیئم کی شرکت دنیا کے سامنے اس کی شراکت داری کے کھلے پن کو ظاہر کرتی ہے،
خاص طور پر ایک سبز اور سمارٹ ملک کے طور پر جو مستقبل کے لیے سمارٹ موبلیٹی نظام کی تشکیل میں ترقی کررہا ہے۔ انہوں نے کہا کہ ہمیں بیلجیئم کے ساتھ دو طرفہ تعلقات پر فخر ہے جو لاجسٹک، لائف سائنسز اور سیاحت جیسے کئی قابل عمل شعبوں میں اسٹریٹجک شراکت داری میں تبدیل ہوئے ہیں
اور ہم مشترکہ مفاد کے شعبوں میں تعاون کو مزید وسعت دینے کے متمنی ہیں۔ بعد ازاں میڈیا سے گفتگو کرتے ہوئے، کنگ فلپ نے کہا کہ بیلجیئم کا ایکسپو 2020 دبئی میں پیغام ہے کہ لوگ اکٹھے ہوں اور مستقبل ، اختراع اور امن کے بارے میں سوچیں، تمام ممالک نے اپنے پویلینز کے ذریعے یہاں نمائندگی کی ہے جو بہت پرامن اور ایک شاندار احساس ہے۔ بیلجیئم پویلین میں دن بھر ثقافتی تقریبات کا انعقاد کیا گیا جس میں جاز سٹیشن بگ بینڈ کی پرفارمنس بھی شامل تھی جس میں گریگوئیر ماریٹ اور برسلز اومیگینگ نے اپنے فن کا مظاہرہ کیا۔
